Tentakulat e karteleve meksikane kanë arritur deri në Ballkan, ku kanë gjetur “tokë pjellore” për të pastruar paratë të ardhura nga aktiviteti kriminal.
Ky është një artikulli i medias meksikane “Vanguardia” dhe “El Universal”, që i referohen burimeve nga qeveria ferderale.
Sipas këtyre burimeve, Ismael Zambada García, i njohur ndryshe si “El Mayo”, kreu i një fraksioni të kartelit të Sinaloas, ka ngritur aleanca me mafien shqiptare për të pastruar miliona dollarë në biznese, prona të paluajtshme dhe investime në sektorin e turizmit në bregdet.
Këto medie në Meksikë citojnë edhe emra në Shqipëri, ku sipas tyre, El Mayo ka krijuar lidhje me vëllezërit Luftar, Arben, Fatos dhe Ramiz Hysa.
Sipas tyre, këta shqiptarë janë pjesë e një grupi kriminal, i cili është vënë në shënjestër të autoriteteve financiare për aktivitetin e tyre të rëndësishëm ekonomik të shtrirë në turizëm dhe atë të kazinove, në Meksikë dhe në Shqipëri.
Sipas burimeve nga “El Universal”, 4 shqiptarët zotërojnë një rrjet kazinosh dhe biznesesh në Sonora, Baja California dhe Quintana Roo, në të cilat pastrojnë miliona dollarë nga krimi i organizuar, së bashku me avokatë dhe drejtues.
Përveç kësaj, ata investojnë shuma të mëdha parash në Shqipëri për t’i pastruar ato në investime të fokusuara në aktivitetet e lojërave të fatit dhe në fushën e turizmit.
Sipas autoriteteve federale, shqiptarët po kryejnë një operacion në emër të kartelit Sinaloa për të transferuar miliona dollarë në vendin e tyre përmes kompanive fiktive.
Lidhjet mes karteleve meksikane dhe grupeve shqiptare të trafikut të drogës dhe pastrimit të parave nuk diheshin deri më tani, sipas autoriteteve të inteligjencës.
