Autoritetet në Taxhikistan thanë se 35 qytetarë u vranë në përleshjet e fundit kufitare me Kirgistanin, duke e rritur numrin e përgjithshëm të vdekjeve në të paktën 81.
Në faqen e saj në Facebook, Ministria e Jashtme e Taxhikistanit raportoi për 35 persona të vdekur, përfshirë civilë, gra dhe fëmijë.
Numri i mëparshëm i dhënë nga ministria ishte 24 të vdekur.
Ndërkohë, numri i vdekjeve nga ana e Kirgistanit u rrit në 46, duke e bërë atë shpërthimin më të keq midis dy vendeve të Azisë Qendrore në vite.
Kirgistani tha se rreth 136 mijë banorë u evakuuan gjithashtu nga fshatrat afër Taxhikistanit.
Presidenti rus, Vladimir Putin, bëri thirrje të dielën për “mos përshkallëzim të mëtejshëm” midis Kirgistanit dhe Taxhikistanit.
Në bisedat telefonike me liderët e vendeve të Azisë Qendrore, Putin u kërkoi gjithashtu atyre “të ndërmarrin hapa për të zgjidhur situatën sa më shpejt të jetë e mundur me mjete ekskluzivisht paqësore, politike dhe diplomatike”.
Të dy vendet e ish-Bashkimit Sovjetik janë tani pjesë e Organizatës së Traktatit të Sigurisë Kolektive të udhëhequr nga Rusia (CSTO), por ato kanë rregullisht tensione në rritje.
Të premten, të dy palët ranë dakord për një armëpushim, por që atëherë luftimet vazhduan me të dyja palët duke akuzuar njëra-tjetrën për shkelje të marrëveshjes.
“Pas më shumë përleshjeve të shtunën, nata kaloi e qetë, pa incidente”, thanë autoritetet Kirgistan të dielën në mëngjes.
Sekretari i Përgjithshëm i Kombeve të Bashkuara, Antonio Guterres, i bëri thirrje udhëheqjes së të dyja palëve “të angazhohen në dialog për një armëpushim të qëndrueshëm”.
