Sekretari i Shteteve të Bashkuara të Amerikës, Antony Blinken, në një bisedë telefonike që ka pasur me Presidentin e Serbisë, Aleksandër Vuçiç, ka theksuar domosdoshmërinë e arritjes së shpejtë të një marrëveshje me Kosovën.
Siç thuhet në njoftimin e presidencës serbe, Blinken dhe Vucic, kanë folur edhe për marrëdhëniet e Serbisë me Rusinë, si dhe për burimet energjetike.
“Tri temat kyçe të bisedës telefonike ishin çështja e Kosovës dhe dëshira e administratës amerikane për të arritur një zgjidhje sa më parë, pastaj raporti i Serbisë me Rusinë, si dhe diversifikimi i burimeve energjetike të vendit”.
Kohëve të fundit, Bashkimi Evropian dhe Shtetet e Bashkuara të Amerikës kanë treguar një dëshirë të madhe për të bërë progres në kuadër të procesit të dialogut Kosovë-Serbi dhe janë shumë më aktivë në këtë drejtim.
Ndryshe, Vuçiç gjatë fjalimit të tij drejtuar popullit serb përsëri ka folur për “kornizën e re” të dialogut e publikuar nga Albanian Post, duke bërë të ditur se propozimi i këshilltarëve për politikë të jashtme të Olaf Scholz dhe Emanuel Macron është në tavolinën e bisedimeve në kuadër të dialogut me Kosovën.
Pozicioni i Serbisë, sipas Vuçiç, po bëhet gjithnjë e më i komplikuar pasi që “në tavolinën e bisedimeve është propozimi i dy shteteve më të fuqishme të Evropës i cili nuk mund të hidhet nga dritarja”.
