Sekretari i Përgjithshëm i Partisë së Lirisë, Tedi Blushi ka reaguar ndaj një tenderi të kryer nga ministria e Mbrojtjes.
Në tenderin e denoncuar nga Blushi, bëhet fjalë për një event të organizuar nga ministria e Mbrojtjes, ku fondi limit është rreth 68 milionë lekë të reja. Në këtë tender përfshihen bërja e fotografive për eventi dhe shërbimi i hostes nga goca me uniformë.
“Të tjera fakte skandaloze zbulohen nga tenderi që denoncuam pak kohë më parë, i Ministrisë së Mbrojtjes, që ka vendosur të shpenzojë 600 mijë euro për “shërbime çlodhjeje”.
Referuar dokumentave të këtij prokurimi të turpshëm mësohet se me këtë fond të majmë, Niko Peleshi do paguajë edhe 8 vajza hostess me uniformë, për një shërbim 3 orësh (dokumenti bashkëlidhur) në ahengun e “tallavasë” që do të organizojë Ministria e Mbrojtjes, në funksion të të cilit do të blihen edhe 700 tapete e mokete,” është shprehur Blushi, teksa ka shtuar se vlera e tenderit është e barabartë me pagën e 575 pedagogëve që prej muajsh janë në protestë.
