Koreja e Veriut ka lëshuar një tjetër raketë balistike drejt Koresë së Jugut ,këtë pasdite të 13 tetorit.
Lajmi u bë i ditur nga agjencia franceze e lajmeve AFP.
Kjo, në vazhdën e lëshimeve raketore, që Koreja e Veriut ka ndërmarrë së fundmi.
Të fundit, kanë qenë të datës 1 tetor, siç ka bërë me dije Ushtria e Koresë së Jugut në një deklaratë për mediat, e cila shtoi se kishte “zbuluar dy raketa me rreze të shkurtër veprimi të lëshuara nga zona Sunan në Phenian në Detin Lindor”
“Ushtria po ruan gatishmërinë maksimale në koordinim të ngushtë me Shtetet e Bashkuara”, thanë dy shefat e përbashkët të Shtabit të Përgjithshëm të Forcave të Armatosura të Seulit.
Raketat e Koresë së Veriut kanë fluturuar në trajektore të parregullta, të cilat ekspertët thonë se e bëjnë të vështirë gjurmimin dhe kapjen e tyre.
Reagojnë Japonia dhe SHBA
Zëvendësministri japonez i Mbrojtjes, Toshiro Ino, i quajti lëshimet e raketave “provokime të njëanshme dhe të përshkallëzuara vazhdimisht”.
“Veprimet e Koresë së Veriut kërcënojnë paqen dhe sigurinë jo vetëm për Japoninë, por edhe rajonin dhe komunitetin ndërkombëtar dhe janë absolutisht të palejueshme”, tha Ino.
Washingtoni tha se testet nuk paraqesin kërcënim për personelin, territorin apo aleatët e SHBA-ve.
Por lëshimi thekson “ndikimin destabilizues të programeve të paligjshme të armëve luftarake dhe raketave balistike të RPDK-së”, tha Komanda e SHBA-ve Indo-Paqësorit në një deklaratë, duke iu referuar emrit zyrtar të Koresë së Veriut, Republika Popullore Demokratike e Koresë.
Tensionet e rritura në gadishullin Korean
Nisjet vijnë në një kohë kur tensionet janë rritur pasi Koreja e Jugut, Japonia dhe SHBA zhvilluan stërvitjet e tyre të para të përbashkëta anti-nëndetëse në pesë vjet jashtë bregut lindor të Gadishullit Korean.
Kjo u parapri nga anijet e Koresë së Jugut dhe ato amerikane që kryenin stërvitje detare në zonë për katër ditë.
Shteti i izoluar i armatosur me armë bërthamore i sheh këto stërvitje si një kërcënim dhe shpesh është përgjigjur duke kryer testet e tij të armëve.
Ndërkohë, zëvendëspresidentja e SHBA-ve, Kamala Harris, e cila ishte për një vizitë në Seul, përsëriti të enjten në Seul angazhimin “të hekurt” të vendit të saj për mbrojtjen e Koresë së Jugut kundër Veriut.
Pheniani u përgjigj me disa lëshime raketash, duke përfshirë një raund vetëm disa orë pasi Harris u largua nga Koreja e Jugut.
Washingtoni kishte dërguar gjithashtu aeroplanmbajtësen me energji bërthamore USS Ronald Reagan në Korenë e Jugut përpara vizitës së Harris në një shfaqje force kundër Phenianit.
Zyrtarët si në Washington ashtu edhe në Seul besojnë se udhëheqësi i Koresë së Veriut Kim Jong Un po përgatitet për një provë bërthamore pas pesë vjetësh.
