Komisioni i Ligjeve është përfshirë sot nga debati i fortë mes shumicës dhe opozitës për hapjen e dosjeve. PS në parim është shprehur pro nismës së Enkelejd Alibeajt. Por debati nisi në pikën që Alibeaj kërkon që dosjet të hapen për të gjithë dhe informacioni të publikohet edhe nëse pala e prekur nga regjimi asokohe nuk e kërkon. Këtu hasi në kundërshtinë e socialistëve që e rrëzuan këtë kërkesë. Kaq mjaftoi për të kaluar në sharje dhe ofendime. Mbledhja u ndërpre për herë të dytë brenda pak minutave.
Debati në komisionin e Ligjeve.
Nuk miratohet amendamenti (lexo këtu) i Enkelejd Alibeajt. Shumica e rrëzon
Enkelejd Alibeaj kërkon fjalën
Bushka: Duro se jam në shpjegim. Zoti Alibeaj, ju lutem qetësohuni. Ju lutëm te jeni të ftohtë.
Alibeaj: Zvarritjet tregojnë qëndrimin politik dhe asgjë më shumë sesa fytyrën e vërtetë të mazhorancës. Ju me këtë votim, që sapo bëtë duke hedhur poshtë amendamentin për hapjen e dosjeve, i mbyllët dosjet. Treguat fytyrën e vërtetë, të 30 viteve që dosjet duhen mbajtur mbyllur, se edhe në politikë mbahen ca njerëz lidhur për këmbësh. Asgjë më shumë dhe as më pak sesa kërkoni të instrumentanizoni edhe Autoritetin e Hapjes së dosjeve.
Bushka: Ju lutem jo politikë
Alibeaj: Jam i qetë, o Klotilda.
Bushka: Ju lutem, mos na paragjykoni.
Alibeaj: Unë jam duke ju gjykuar dhe jo paragjykuar.
Bushka: Saktësohuni. Nuk është kundër, por duke diskutuar në nen tjetër.
Alibeaj: Qefalia abstenoi, të tjerët ishin kundër. Sikur po kërkoni të mbroni viktimat e sigurimit të shtetit, se duke u hapur dosjet gërryen plagë të vjetra? Ju që jeni pjellë të partisë së punës, shkaktar të bindjeve dhe autor të sigurimit të shtetit. Ju jeni duke menduar për dhimbjet e atyre njerëzve, pasi ua shkaktuat për 40 vite me radhë.
Bushka: Ndërpritet fjala
Alibeaj: Jeni si sigurimi i shtetit, të hiqni edhe fjalën.
Bushka: Ju jeni duke manipuluar. Nismën nuk po e hedhim poshtë, por thamë që nuk do ta bëjmë në këtë nen, por tjetrin.
Alibeaj: Ju votuat kundër, që të mos hapen dosjet e sigurimit.
Bushka: Mos u bëni heronj këtu
