Partia Demokratike e drejtuar nga Sali Berisha hapi sot zyrtarisht procesin e primareve brenda së djathtës për të nxjerrë kandidatët për zgjedhjet lokale të vitit tjetër. Ai njohu kryesinë me udhëzimin dhe theksoi se është duke negociuar me aleatët.
“Do të jenë demokratët që me votën e tyre do të përcaktojnë qytetarët e parë, por edhe këshilltarët. Mendoj se kjo risi është një kontribut thelbësor i opozitës shqiptare në demokracinë e këtij vendi.
Veçanërisht zbatimi i kësaj praktike merr një rëndësi të veçantë po të kemi parasysh qëndrimin anti-demokratik që është mbajtur vitet e fundit. Në udhëzim janë edhe datat konkrete. Janë zhvilluar dhe do të zhvillohen takime intensive me aleatët për të gjetur gjuhën e përbashkët.
Kanë sugjerime të drejta. Kanë propozime të arsyeshme. Theksoj që mirëpriten të gjitha sugjerimet dhe kandidaturat e tyre. Ju ftoj, ju kryetarët e grupeve të punës, të bëhen të gjitha promovimet” tha ai.
