Gabriela Heinrich, kryetare e grupit parlamentar të partisë gjermane SPD ndodhet në një vizitë zyrtare në Shqipëri. Deputetja gjermane është pritur edhe nga kryetari i grupit të PS-së, Taulant Balla.
Socialisti në konferencën për mediat, u pyet për amnistinë fiskale dhe theksoi se shumica po punon me BE-në për paketën, pasi Brukseli ka qenë kritik për nismën.
“Ne do të vijojmë të konsultohemi për Amnistinë Fiskale dhe do të kemi draft në bashkëpunim me BE. Nuk është e ndaluar por duhet bërë në rekomandimet më të mira nga BE. Nuk ka ardhur ende në parlament drafti, ndaj kini durim.
E rëndësishme të kuptojmë se në këtë situatë të vështirë ekonomike të shkaktuar nga inflacioni i luftës, të gjitha qeveritë mundohen të sigurojnë të ardhura shtesë për efektet e krizës. Amnistia fiskale është për t’u ardhur në ndihmë atyre që kanë më shumë nevojë“, tha Balla.
