Mbrëmjen e djeshme lagja “18 Tetori” në Lushnje u trondit nga një shpërthim me eksploziv. Shënjestër ishte banesa e Altin Lamçes, tregtar fruta-perimesh.
Dy janë pistat ku po hetohet deri tani; hakmarrja ose konflikt. Altin Lamçe nuk rezulton të jetë person me precedentë penal.
Fatmirësisht nga shpërthimi i lëndës plasëse rreth orës 21:40 minuta të së martës nuk pati të lënduar, por vetëm dëme materiale.
Lënda plasëse dyshohet se u hodh nga rruga drejt oborrit të shtëpisë, nga një makinë në lëvizje.
Nga shpërthimi u thyen xhamat dhe dyert e shtëpisë. Dëme pësuan po ashtu edhe dy makina që ishin të parkuara në oborr.
Në banesë jetojnë 5 persona, çifti Lamçe me dy fëmijët e mitur 12 dhe 15 vjeç dhe nëna 77-vjeçe.
