Koreja e Veriut lëshoi një raketë balistike ndërkontinentale (ICBM) të enjten e 3 nëntorit, por ajo dështoi në mes të fluturimit.
Kështu deklaroi ushtria e Koresë së Jugut. Kjo vjen një ditë pasi të dyja Koretë lëshuan raketa në një përshkallëzim të tensioneve.
Ai shkëmbim pa numrin më të madh të raketave të lëshuara nga Veriu në një ditë të vetme.Nisjet e shumta të Koresë së Veriut vijnë pasi SHBA-të dhe Koreja e Jugut po organizojnë stërvitjet e tyre më të mëdha ajrore të përbashkëta ndonjëherë, të cilat Pheniani i ka kritikuar ashpër si “agresive dhe provokuese”.
Koreja e Veriut lëshoi të paktën 23 raketa në det vetëm këtë të mërkurë të 2 nëntorit.
Madje dje shënua edhe hera e parë që një raketë balistike ulet pranë ujërave të Jugut që nga ndarja e gadishullit në vitin 1945.
Raketa ra jashtë ujërave territoriale të Koresë së Jugut, por në jug të vijës kufitare veriore (NLL), një kufi detar i diskutueshëm ndër-korean.
Po ashtu sot, Koreja e Jugut vendosi t’i përgjigjej provokimeve duke qëlluar tre raketa ajër-tokë në veri.
Një zyrtar tha se armët e përdorura përfshinin një AGM-84H/K SLAM-ER, e cila është një armë sulmi precize e prodhuar në Shtetet e Bashkuara të Amerikës dhe që mund të fluturojë deri në 270 kilometra.
Nisjet e Jugut erdhën pasi zyra e presidentit u zotua për një “përgjigje të shpejtë dhe të vendosur”.
SHBA-të dënuan lëshimet e raketave të Veriut dhe “vendimin e saj të pamatur për të gjuajtur një raketë nën kufirin de facto me Republikën e Koresë”, tha një zëdhënës i Departamentit të Shtetit të mërkurën.
Linja e demarkacionit shënon pikën e përafërt në mes të rrugës në det midis Koresë së Veriut dhe Koresë së Jugut, por Veriu nuk e ka pranuar kurrë kufirin.
