Kryetari i Listës Serbe, Goran Rakiç, tha gjatë një konference për media se serbët duan vetëm paqe.
“Po i kërkoj Prishtinës që të mos nxisë tensione dhe të mos përdorë forcën. Shpresoj se nuk do të na duhet të mbrohemi nga dhuna e [Albin] Kurtit”, tha Rakiç.
Konferenca e mbajtur më 22 nëntor në Mitrovicën e Veriut, vjen pas takimit që përfaqësuesit serbë në Kosovë kanë pasur me presidentin e Serbisë, Aleksandar Vuçiç, kryeministren Ana Brnabiç, dhe drejtorin e Zyrës për Kosovën në Qeverinë e Serbisë, Petar Petkoviç.
Rakiç tha se Asociacioni i komunave me shumicë serbe është rezultat i marrëveshjeve ndërkombëtare, dhe se serbët nga Kosova po kërkojnë vetëm që marrëveshjet e nënshkruara të zbatohen, ashtu siç është rënë dakord në Bruksel.
“Ne duam të jetojmë të qetë dhe vetëm”, tha Rakiç.
Kosova dhe Serbia kanë arritur marrëveshje për krijimin e Asociacionit të komunave me shumicë serbe në vitin 2013, në kuadër të dialogut për normalizimin e marrëdhënieve, të ndërmjetësuar nga BE-ja./REL