Kryetari i Partisë së Lirisë, Ilir Meta kërkoi sot shpalljen e gjendjes së emergjencës në Shkodër, Lezhë dhe Durrës për shkak të përmbytjeve. Ai akuzoi KESH-in se me hapjen e portave të HEC-eve përmbyti Shkodrën dhe tani, tha më tej ai, po e shet energjinë shumë herë më lirë sesa e bleu.
“KESH e bleu energjinë më shtrenjtë dhe e shet shumë herë më lirë bursë. Dështoi sistemi satelitor që u paguan 1.5 mln euro, për të parashikuar me saktësi motin. Komiteti u mbyll vetëm të shtunën kur katastrofa kishte filluar.
Situata rrezikon që të përkeqësohet. Reshje të tjera priten. Është e domosdoshme shpallja e gjendjes së fatkeqësisë natyrore. Duhet të bëhet menjëherë.
Kemi të bëjmë me një fatkeqësi natyrore të shkaktuar nga keqmenaxhimi i kaskadave që duhet të dëmshpërblejë qytetarët dhe banorët për dëmet dhe drejtësia të veprojë ndaj drejtuesve të KESH-it” deklaroi Meta.
