Objektet fluturuese të paidentifikuara ranë nga qielli ditën e sotme në rrethin Yelansky të rajonit të Volgogradit në Rusi.
Drejtoria kryesore e Ministrisë së Emergjencave të rajonit të Volgogradit refuzoi të komentojë mbi incidentin.
Gazetarët vunë re në pamjet se në vendin ku ndodhi ngjarja ndodheshin punonjës të kompanisë administruese të rrjetit energjetik Rosseti-Yug.
Kryetari i Dupovsky, Alexey Golev reagoi në lidhje me rënien e objektit në rrethin Yelansky të rajonit të Volgogradit duke u shprehur se nuk kishte viktima.
“Fatmirësisht nuk ka të vdekur apo të lënduar për shkak të situatës. Kjo ndodhi në orën 9 të mëngjesit. Diçka ka rënë në ara dhe diçka tjetër në zonën e një rezidence private është dëmtuar një kasolle. Për çfarë fragmentesh janë këto, për momentin nuk është e mundur të përcaktohet. Zona është e rrethuar, jemi në pritje të ushtrisë”, tha ai.
Administrata e rrethit Yelansky konfirmoi për median ruse RBK se “objekte metalike” kishin rënë nga qielli.
“Në mëngjesin e 16 dhjetorit 2022, numri i telefonit të urgjencës 112 raportoi rënien e objekteve metalike në zonën e komunës Yelansky. Informacioni i është përcjellë policisë lokale, Ministrisë së Emergjencave dhe agjencive të tjera për të ndërmarrë veprimet e nevojshme. Zona është rrethuar nga policia. Në këto incidente nuk ka të lënduar, nuk janë shkaktuar dëme në infrastrukturë të rëndësishme nga aspekti social”, tha ai për RBK.
