Në fjalimin e tij të Krishtlindjes më 25 dhjetor, Papa Françesku bëri thirrje për përfundimin e menjëhershëm të luftës në Ukrainë, një konflikti dhjetë-mujor që ai e cilësoi si “të pakuptimtë”.
Gjatë fjalimit tradicional të njohur si “Urbi et Orbi” [nga latinishtja: për qytetin dhe botën], nga ballkoni qendror i Bazilikës së Shën Pjetrit, Papa u lut edhe për të gjithë njerëzit që janë prekur nga i ftohti ekstrem gjatë Krishtlinjes.
Dhjetëra mijëra turistë, pelegrinë dhe banorë të Romës u grumbulluan në sheshin e Shën Pjetrit për të dëgjuar Papën dhe për të marrë bekimin e tij.
Ai tha se “rruga e paqes” bllokohet nga forcat që përfshijnë “lidhjen me pushtetin dhe paranë, krenarinë, hipokrizinë, gënjeshtrën”.
“Nëse duam që të jetë Krishtlindja, lindja e Jezusit dhe e paqes, le të shkojmë në Betlehem dhe të sodisim fytyrën e fëmijës që ka lindur për ne”, tha ai. “Dhe në atë fytyrë të vogël dhe të pafajshme, le të shohim fytyrat e të gjithë atyre fëmijëve që kudo nëpër botë dëshirojnë paqen”.
Në Kishën e Lindjes së Krishtit në Betlehem të Bregun perëndimor, besimtarët besojnë se ka lindur Jezu Krishti.
Françesku u bëri thirrje besimtarëve të kujtojnë miliona ukrainas që janë pa energji elektrike ose ngrohje, për shkak të sulmeve ruse në infrastrukturën energjetike, si dhe miliona të tjerë që jetojnë si refugjatë jashtë vendit ose të zhvendosur brenda vendit të tyre që nga pushtimi që nisi më 24 shkurt./REL
