Autoritetet rumune kanë njoftuar se kanë sekuestruar pasuri me vlerë 18 milionë lei (3.95 milionë dollarë) si pjesë e një hetimi kriminal për trafikimin e qenieve njerëzore që çoi në arrestimin e ish-kikboksierit profesionist dhe influencuesit të diskutueshëm Andrew Tate.
Javën e kaluar, Agjencia Kombëtare për Menaxhimin e Pasurive të Konfiskuara mori nën kontroll 29 pasuri duke përfshirë automjete luksoze dhe ora, si dhe shuma të ndryshme parash në monedha të ndryshme.
Dje, një reporter i Reuters pa disa makina, duke përfshirë një Rolls-Royce, një BMW dhe një Mercedes-Benz, duke u zhvendosur nga kompleksi Tate në periferi të kryeqytetit, Bukuresht, në një depo.
Andrew Tate, vëllai i tij dhe dy gra rumune u arrestuan më 29 dhjetor me akuzën e krijimit të një organizate kriminale për të shfrytëzuar seksualisht gjashtë gra. Të gjithë ata i kanë mohuar akuzat.
Të arrestuarit kundërshtuan urdhër-arrestin e tyre 30-ditor, por gjykata e apelit e Bukureshtit e hodhi poshtë kërkesën javën e kaluar, duke i urdhëruar ata të mbeten në paraburgim policor.
Andrew Tate, një ish-konkurrent në shfaqjen e realitetit televiziv në Mbretërinë e Bashkuar, Big Brother, u bë i njohur për komentet dhe gjuhën e urrejtjes.
Ai ka thënë se gratë që dhunohen janë pjesërisht përgjegjëse për përdhunimin e tyre dhe se ato i përkasin burrave.
