Pasuria e Alda Klosit tashmë është në sitën e Prokurorisë së Tiranës. Pas vjedhjes së rreth 120 mijë eurosh në shtëpinë e saj nga Rozeta dobi dhe i biri Havieri, prokuroria nisi verifikimet për pastrim parash.
Përveç deklaratave të pasurisë të dorëzuara në ILDKPI, prokuroria i ka dërguar shkresë Kadastrës dhe bankave të nivelit të dytë për të marrë informacion për Alda Klosin.
I njëjti verifikim po bëhet edhe për Rozeta e Havier Dobin. Prokuroria e Tiranës po vijon hetimet për të zbuluar se kush është pronari i shumës prej mbi 400 mijë eurosh që u zbuluan në tubin e aspiratorit në shtëpinë e pastrueses Rozeta Dobi.
Pavarësisht se këtyre parave deri tani nuk iu ka dalë asnjë posedues, prokuroria po verifikon të gjithë listën e kontakteve ku Dobi ka punuar si pastruese.
Në celularin e të dyshuarës janë zbuluar emra zyrtarësh të cilëve janë marrë në pyetje por asnjëri nuk ka pretenduar vjedhje parash.
Vetë e dyshuara Dobi në dëshminë e saj dhënë para hetuesve ka pranuar se ka vjedhur shumën prej 120 mijë eurosh në shtëpinë e ish-zyrtares Klosi, ndërsa për paratë e zbuluara me vonë në banesën e saj nuk ka pranuar të flasë.
Ndërsa i biri Havier Dobi ka dëshmuar se vetëm ka qenë në dijeni të vjedhjes së kryer nga e ëma por nuk ka informacione për veprimet dhe kontaktet e saj.
Pavarësisht kësaj 21-vjeçari ishte përfituesi kryesor i parave të vjedhura nga e ëma. Megjithëse i papunë ai zotëronte 3 makina dhe shfaqte jetë luksi në rrjetet sociale.
