Një trafikant shqiptar i deportuar në vitin 2020 është kthyer fshehurazi në Britani. Armand Gjyriqi ishte një nga 12 kriminelët e deportuar në vitin 2020 si pjesë e politikës së tolerancës zero të ish-Sekretares Priti Patel, kundër emigrantëve që kërcënojnë sigurinë kombëtare të Britanisë.
Por DailyMail ka zbuluar se Gjyriqi, 30 vjeç, rihyri ilegalisht në Britani vitin e kaluar me gomone duke pretenduar se ishte viktimë e trafikantëve. Sipas mediave britanike Gjyriqi është një nga afro 1000 kriminelët e rrezikshëm(mes tyre vrasës, përdhunues dhe tregtarë droge), të cilët kanë kaluar ilegalisht Kanalin dhe jetojnë në komunitet.
Gjyriqi mbërriti në Britaninë e Madhe në vitin 2000 dhe iu dha leja e kufizuar për të qëndruar, e cila u rinovua deri në vitin 2017, kur u dënua për shitjen e kokainës dhe u dënua me tetë vjet. Ai bëri më pak se gjysmën e këtij dënimi para se të lirohej dhe u deportua në Shqipëri në vitin 2020.
Por ai u kthye dhe hipi në një varkë të vogël nga Franca në maj 2022, duke mbërritur në Dover. Ai u arrestua për shkeljen e urdhrit të tij të dëbimit dhe kaloi katër muaj në paraburgim përpara se të transferohej në paraburgimin e imigracionit.
Ai kërkoi azil, duke thënë se ishte viktimë e trafikantëve të njerëzve dhe aplikoi për lirim me kusht ndërsa çështja e tij ishte duke u proceduar. Gjyriqit i është vënë një byzylyk elektronik dhe është liruar për të jetuar me kushëririn e tij Besmir në Bolton. Shtëpia e tyre me tarracë prej 175,000 £ është pranë çerdhes Happitots, e cila kujdeset për 26 fëmijë nën katër vjeç.
Javën e kaluar autoritetet e gjetën shqiptarin në lavazhin e kushëririt të tij Besmirit, pavarësisht se nuk i lejohet të punonte. Ai konfirmoi identitetin e tij, por nuk iu përgjigj asnjë pyetjeje.
