Zbardhen detaje të reja nga operacioni që u zhvillua mbrëmjen e djeshme ku u zbuluan dhe sekuestruan tetë pistoleta brenda një furgoni në Portin e Durrësit. Armët ishin fshehur brenda një tavoline.
Tavolina po transportohej me një furgon me targa angleze dhe kishte si destinacion Britaninë e Madhe. Shoferi i furgonit, Jetmir Kaloshi 35-vjeç është arrestuar për trafikim të armëve dhe municionit.
Furgoni është ndaluar nga policia në vijën e dytë të kontrollit të terminalit të trageteve ku më pas do të imbarkohej në tragetin e linjës Durrës-Ankona.
Policia e Durrësit bën me dije se u sekuestruan 8 pistoletat, krehra me municion luftarak, aksesorë të ndryshëm armësh, 2 celularë dhe një shumë parash.
Hetimet vijojnë për zbardhjen e plotë të këtij rasti të trafikimit të armëve të zjarrit drejt Anglisë, si dhe për identifikimin dhe vënien përpara përgjegjësisë ligjore të shtetasve të tjerë të përfshirë në këtë veprimtari kriminale.
