Sali Berisha përshëndet stërvitjen e madhe të ushtrive të NATO-s në Shqipëri “Defender Europë 2023” duke u shprehur se është një mesazh i qartë për Rusinë dhe synimin e saj për destabilitet në Ballkan. SHBA që është udhëheqësja e NATO-s nuk përmendet në postimin e ish-kryeministrit.
“Partia Demokratike e Shqipërisë përshëndet fillimin e manovrave të mëdha të NATO-s ‘Defender Europe’ 23 në Shqipëri. Këto manovra janë të një rëndësie të madhe për Shqiperinë dhe sigurinë e saj, por edhe për paqen dhe sigurinë në Europë.
Këto manovra së bashku me manovrat e Nato-s që po zhvillohen në Kosovë janë një mesazh i fuqishëm që Aleanca e Atlantikut të Veriut i dërgon agresorit rus për përpjekjet e tij për destabilizimin e rajonit dhe ambiciet e tij ekspansioniste.
Partia Demokratike si forca politike që anëtarësoi Shqipërinë në NATO, mbështet plotësisht garantimin e të gjitha lehtësirave në territorin tokësor, ujor dhe ajror të Shqipërisë që i nevojiten Aleancës për përmbushjen e misionit të mbrojtjes së paqes dhe sigurisë në hapsirën euroatlantike” shkruan Berisha.
