Ish-ministër i Brendshëm Saimir Tahiri është liruar nga burgu. Pas 16 muajve, Tahirit i është hapur dera e burgut.
Gjyqtarja Matilda Fetahu në Elbasan ku u zhvillua procesi gjyqësor ka pranuar kërkesën e ish-ministrit përmes avokatit Maks Haxhia për ta liruar.
Pra lirimi është me kusht dhe pjesën e mbetur do të qëndrojë i izoluar në shtëpi. Ai u dënua në 4 shkurt të vitit të kaluar 3.4 vite burg me akuzën për shpërdorim të detyrës.
Por përse u lirua?
Zyrtarisht ende nuk dihet, por paraprakisht mësohet se ka qenë një ekspertizë mjekësore që e cilësonte Tahirin si një person që nuk duhet të qëndrojë në ambientet e burgut.
Kjo ka qenë arsyeja që e ka bindur gjykatën që ta lirojë në kushte shtëpie.
Dënimi
Më 4 shkurt të vitit 2022, Apeli i Gjykatës Kundër Krimit të Organizuar dhe Korrupsionit dënoi Tahirin me 5 vite burg për ‘Shpërdorim të detyrës’. Por me gjykim të shkurtuar dënimi u ul në 3 vite e 4 muaj burgim.
Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
