Kremlini njoftoi sot se Rusia ka pezulluar pjesëmarrjen e saj në marrëveshjen e eksportit të grurit në Detin e Zi. “Në fakt, marrëveshjet e Detit të Zi pushuan së zbatuari sot” tha zëdhënësi i Kremlinit Dmitry Peskov.
“Fatkeqësisht, pjesa e këtyre marrëveshjeve që kanë të bëjnë me Rusinë nuk është zbatuar deri më tani, kështu që vlefshmëria e saj është ndërprerë”, shtoi Peskov.
“Pasi të përmbushet pjesa ruse e marrëveshjeve, pala ruse do t’i kthehet zbatimit të kësaj marrëveshjeje, menjëherë”, theksoi ai më pas. Kjo marrëveshje, e cila u ndërmjetësua nga OKB-ja dhe Turqia korrikun e kaluar, synonte të lehtësonte krizën globale të ushqimit duke lejuar eksportin e sigurt të drithit ukrainas që ishte bllokuar në portet e Detit të Zi nga lufta në Ukrainë.
Rusia ka informuar zyrtarisht Turqinë, Ukrainën dhe OKB-në se kundërshton zgjatjen e saj, njoftoi agjencia ruse e lajmeve RIA, duke cituar zëdhënësen e Ministrisë së Jashtme ruse Maria Zakharova.
Marrëveshja, e cila u zgjat disa herë, skadon sot. Rusia ka muaj që thotë se nuk janë plotësuar kushtet për zgjatjen e saj. Kremlini gjithashtu vuri në dukje se vendimi i Rusisë për të pezulluar pjesëmarrjen e saj në marrëveshjen e grurit nuk lidhej me sulmin brenda natës në urën e Krimesë.
Peskov tha se qëndrimi i presidentit Vladimir Putin për marrëveshjen e grurit ishte i njohur përpara sulmit. Rusia fajësoi sot Ukrainën për një sulm gjatë natës në urën e Krimesë nga dronët detarë që vranë dy persona.
