Christiane Hohmann, ambasadorja e BE-së në largim gjatë mbledhjes së Këshillit Kombëtar për Integrimin Europian kërkoi reforma dhe që gjyqësori të rrisë standardet.
“Gjyqësori të japë rezultatet në standardet europiane dhe të mos ketë pikëpyetje. Gjyqësorit duhet t’i ofrohet buxheti i duhur, që të ketë pajisjet dhe personalin e nevojshëm. Kjo ka efekt “domino” edhe në fushat e tjera” tha ajo.
Hohmann u ndal konkretisht te fondet që Shqipëria pret nga Brukseli. Fillimisht duhet të plotësohen kushtet. “Nuk ka drekë falas. Edhe këtu nuk ka fonde falas. Nëse do të marrësh fonde të BE-së duhet të plotësosh disa kushte.
Ky është një propozim që po diskutohet me shtetet anëtare. Paketa përfundimtare nuk është akoma, por ky është një objektiv i deklaruar që paralelisht me reformat të krijohen edhe kushtet, jo për investime dhe vende pune, por arsye për njerëzit, që të thonë; unë dua të rri këtu” tha ajo.
