Kryediplomati kroat, Gordon Grlic Radman tha sot në Forumin Strategjik vjetor, dy ditorë, në Bled të Sllovenisë, se negociatat e anëtarësimit midis Bashkimit Evropian dhe Bosnjë Hercegovinës janë në rrugën e duhur për të filluar nga fundi i këtij viti ose në fillim të vitit 2024.
Bosnja dhe Hercegovina mori statusin e vendit kandidat në BE dhjetorin e kaluar.
“Ne mund të presim fillimin e negociatave të pranimit midis Bosnjë Hercegovinës dhe BE-së, nëse jo deri në fund të këtij viti, që do të ishte më e mira, atëherë sigurisht në fillim të vitit të ardhshëm,” tha Grlic Radman.
Të hënën, duke iu drejtuar gjithashtu forumit, presidenti i Këshillit Evropian Charles Michel përsëriti angazhimin e bllokut për zgjerimin drejt vendeve të Ballkanit Perëndimor deri në vitin 2030, duke thënë se BE duhet të jetë gati për anëtarë të rinj.
