Një ditë pas sulmit që një grup paramilitar serb kreu në Zveçan duke i marrë jetën rreshterit Afrim Bunjaku, policia e Kosovës gjatë një konference për mediat ka ekspozuar të gjithë arsenalin e armëve që ka sekuestruar në operacionin e zhvilluar në manastirin e Banjskës.
Ministri i Brendshëm kërkoi nga Serbia që 6 persona, të cilët, sipas tij, po kurohen në Novi Pazar pas shkëmbimit të zjarrit me Policinë e Kosovës, t’i dorëzohen autoriteteve kosovare për t’u përgjigjur para drejtësisë.
Drejtori i Përgjithshëm i Policisë së Kosovës, Gazmend Hoxha ka shpjeguar si arritën që të largoheshin terroristët që ishin brenda dhe jashtë rrethimit të manastirit pas ndërhyrjes së policisë.
“Personat e tjerë që janë parë nga pamjet e siguruara ku ishin afro 30, dyshohet se kanë arritur që të largoheshin në këmbë nga hapësirat brenda dhe rreh manastirit duke lënë mbrapa automjetet e tyre që gjatë ekzaminimit janë gjetur 24 automjete, një mjet i blinduar dhe dy motor me katër rrota.
Në brendi të automjeteve gjendej sasi e madhe armatimi, raketahedhës, uniforma që dyshohet se i kanë zhveshur personat e dyshuar”, tha Hoxha. Ai shtoi se edhe brenda manastirit janë gjetur disa armë automatike dhe raketahedhës.
“Është konstatuar se asnjë nga automjetet nuk kishin targa, në një nga automjetet Mercedes G Class me targa BG-1107-YY është gjetur një dokument i aplikimit të armës së Milan Radoiciç, nënkryetarit të Listës Serbe duke ngritur dyshimin e fuqishëm se në mesin e personave të armatosur ka qenë edhe vet Radoiçiç”, tha Hoxha.
Sveçla: Serbia të dorëzojë 6 terroristët që po kurohen në Novi Pazar
