Seanca e sotme e Kuvendit kishte kryefjalë problemet e qytetarëve pas javës që deputetët presupozohet se erdhën nga baza dhe dëgjuan hallet e popullit.
Ish-zv/ kryeministri Erion Braçe në fjalën e tij në parlament ngriti shqetësimin e imputeve bujqësore.
Deputeti socialist tha se bujqit po zhvaten nga monopoli i plehrave kimikë. Janë vetëm dy kompani në treg. Ai listoi edhe çmimet.
“Karteli i tregimit të plehrave kimike. Janë vetëm dy kompani që kanë bërë monopol edhe dapin edhe urenë.
Sot në Durrës ureja hyn me 250 dollarë tonin, në treg është me 450 dollarë tonin. Kjo diferencë kaq e madhe nuk justifikohet.
Sot nga tregjet ndërkombëtare deri sa del nga dogana dapi është 720 mijë lekë toni dhe në treg është 900 mijë lekë.
Nuk justifikohet me asgjë tjetër veç kartelit që funksionin në këtë treg. Duhet të rihetohet ky treg. Nuk funksionon që kapet në shkelje, gjoba nuk arkëtohet dhe atje nuk ndryshon asgjë” tha ai.