Mediat turke zbardhin detaje të reja nga arrestimi i bosit të madh shqiptar Dritan Rexhepi. Kreu i kartelit të drogës “Kompania Bello” që trafikonte kokainën nga vendet e Amerikës Latine në Europë u prangos në Stamboll.
Lajmin e dha ministri turk i Brendshëm, Ali Yerlikaya. Ai deklaroi se Rexhepi ka hyrë në Turqi nga aeroporti i Stambollit me pasaportë kolumbiane të regjistruar në emrin e Benjamin Omar Perez Garcia.
Ministri publikoi edhe pamjet e momentit kur forca të shumta policie rrethojnë vendin ku po qëndronte shqiptari duke shqyer derën. Brenda iu gjetën armë zjarri dhe shuma në euro.
Më tej ministri tha se suksesi i operacionit erdhi pas informacioneve me policinë italiane, por skenarët janë të shumtë si mund të ketë shkuar policia në gjurmët e tij.
A ka pasur një tradhtar nga brenda, i ndoqën njerëzit e afërt, apo ishte rastësi? Në vijim pritet që të zbardhen më shumë detaje. Kapja e tij është e bujshme pasi kontrollonte një rrjet të fuqishëm dhe mbrojtja ishte maksimale.
Ilir Kulla tha në emisionin “Zonë e lirë” se Rexhepi ndiqej prej vitesh nga autoritetet italiane. Ai tha se këto autoritete e kanë vëzhguar prej vitesh dhe se kanë e gjetur nëpërmjet fëmijëve.
VIDEO-E kërkonte e gjithë bota! Shqyhet dera, si u kap bosi i madh në krevat?
“Lufta jonë kundër tregtarëve të drogës dhe organizatave të krimit të organizuar do të vazhdojë të rritet me vendosmëri. Ne jemi të vendosur të pastrojmë vendin tonë nga organizatat kombëtare dhe ndërkombëtare të krimit të organizuar dhe trafikantët e helmeve” tha ai.
Dritan Rexhepi ishte në burg në Ekuador ku doli me kusht, por u arratis. Ai ka një skedë të zezë në Shqipëri me vrasje, pengmarrje, plagosje, etj. Dosja e fundit për të cilën akuzohet në Shqipëri është pengmarrja dhe zhdukja e Jan Prengës pas një konflikti me të vëllanë për kokainën në Angli. Gjithashtu kërkohet nga disa vende në Europë, mes tyre Italia.
