Zef Deda është përcjellë sot nga teatri “Migjeni” për në banesën e fundit.
Djali i madh i aktorit, Jul Deda ka mbajtur një fjalim prekës dhe emocionues duke u shprehur se Zefi, ishte një baba, bashkëshort i jashtëzakonshëm, një gjysh i mrekullueshëm dhe një aktor i madh.
Ai shtoi se nuk e di nëse ai dhe familja e tij do të mund të mbajnë emrin e madh që Zef Deda ka lënë në Shkodër dhe gjithë Shqipërinë.
“Kam dëshirë me falenderu Zef Dedën. Një babë i jashtëzakonshëm, bashkëshort i jashtëzakonshëm, gjysh i mrekullueshëm, aktor shumë i madh. Nuk e di se sa të fokusuar me qenë unë edhe Mario dhe fëmijët tonë për të ruajtur emrin që ai ka lënë në Shkodër dhe Shqipëri.
Shpresoj t’ia dalim, por besoj se një ndihmë e madhe ka me qenë edhe baba duke na ruajtur nga lart. Me punën e tij, me moralin e tij dhe mënyrën se si është sjell në jetë, na e ka bërë jetën më të lehtë.
E falënderoj nga zemra. Kam dëshirë t’ju falënderoj dhe ju, kolegët e babës, për shumë vite. Keni marrë dhe keni dhënë me njëri-tjetrin. Jeni një brez që keni ruajtur miqësi me njëri-tjetrin, sot nuk është më kjo.
Unë dua t’ju kërkoj meqenëse sot është për herë të fundit në teatrin ‘Migjeni’ një duartrokitje” u shpreh Jul Deda.
