Një 60-vjeçar nga Kolonja ka humbur kontaktet me familjen. Novruz Zhuli ka telefonuar dy ditë më parë familjarët nga Greqia, duke i njoftuar se do të kthehej në Ersekë përmes kufirit të gjelbër nga mali për shkak se nuk kishte dokumente të rregullta.
Ai punonte në shtetin grek me punë sezonale, ndërsa ka marrë rrugën për t’u kthyer nga mali i Gramozit në kushte shumë të këqija atmosferike për shkak të reshjeve.
Familjarët janë munduar ta kontaktojnë në telefon por nuk kanë mundur të flasin më me 60-vjeçarin. Sipas policisë nuk dihet ende nëse ka ndodhur gjë me të, apo është kthyer mbrapsht drejt shtetit grek. Kërkimet vazhdojnë.
