Qeveria synon që të orientojë politikën e nisur para pak kohësh në lidhje me bonusin e bebeve të porsalindura në Shqipëri.
Sipas vendimit të miratuar të mërkurën e kësaj jave, Këshilli i Ministrave ka bërë disa ndryshime në lidhje me rregullat për përfitimin e bonusit.
Këshilli i Ministrave ka vendosur kushtin e ri për qëndrimin e 180 ditëve në Shqipëri në vitin paraardhës për prindërit e foshnjave të sapolindura. Këto të dhëna do të merren nga sistemi TIMS.
Gjithashtu për shtetasit e huaj që janë vendosur në Shqipëri si azilkërkues apo refugjatë duhet të vendosin që shtetësia e fëmijës të jetë shqiptare.
Qeveria miratoi bonusin e bebeve që ka një përfitim financiar prej 40 mijë lekësh për fëmijën e parë, 80 mijë lekë për të dytin dhe 120 mijë lekë për të tretin dhe foshnjat e tjera në vijim si një politikë për rritjen e lindshmërisë por deri më sot nuk ka një vlerësim mbi efektivitetin e saj.
