Një konflikt në një familje në Gjirokastër është parandaluar përpara se të kalonte në një fatkeqësi me humbje jete.
Policia bën me dije se për motive të dobëta, një 47-vjeçar ka qëlluar me armë gjahu, në drejtim të banesës ku kishte familjarët. Fatmirësisht nuk ka pasur të plagosur ndrësa 47-vjeçari L.S., ka përfunduar në pranga.
“Menjëherë pas njoftimit se rreth orës 09:15 të mëngjesit të sotëm, për motive të dobëta, një shtetas kishte qëlluar me armë gjahu, në drejtim të banesës ku ishin familjarët e tij, në zonën e quajtur “Ura e lumit”, shërbimet e Komisariatit të Policisë Gjirokastër organizuan punën dhe mbërritën në vendin e ngjarjes, për të arrestuar shtetasin përgjegjës.
Si rezultat, u bënë të mundur parandalimi i përshkallëzimit të mëtejshëm të këtij konflikti, si dhe arrestimi i autorit të dyshuar, shtetasit L. S., 47 vjeç, banues në Gjirokastër.
Gjithashtu, u gjet dhe u sekuestrua në cilësinë e provës materiale, arma e gjahut me të cilën qëlloi i arrestuari.
Nga të shtënat nuk ka shtetas të dëmtuar.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme” njofton policia.
