Kreu i Komunitetit Mysliman Bujar Spahiu uron besimtarët për Fitër Bajramin që do të festojnë nesër. “Zoti i Gjithësisë qoftë i kënaqur me ne dhe na e pastë pranuar agjërimin. Fitër Bajrami është festa e përmbylljes me sukses me lejen e zotit të një rrugëtimi të përsosjes shpirtërore.
Bajrami është lumturia që ne ndjejmë me plotësimin e agjërimit të Ramazanit si dhe falenderimi ndaj zotit për mirësinë që na ka begatuar.
E lusim Zotin për rininë tonë që ta udhëzojë atë, e lusim zotin për prindërit, të moshuarit dhe çdo njeri në nevojë që t’ja largojë brengat dhe vuajtjet.
E lusim Zotin e lartësuar që luftrat që po marrin jetë civilësh dhe fëmijësh në Gaza, Ukrainë dhe kudo të marrin fund sa më parë” tha ai.
Komuniteti Mysliman i Shqipërisë njofton të gjithë besimtarët se Fitër Bajrami do të falet ditën e mërkurë, 10 Prill 2024, në orën 06:55 në sheshin “Skënderbej”, Tiranë.
