Qeveria e Sllovenisë miratoi të enjten një mocion për të njohur një shtet palestinez dhe i kërkoi parlamentit të bëjë të njëjtën gjë.
Kryeministri Robert Golob tha se qeveria e tij e dërgoi propozimin e njohjes në parlament, i cili mund të mblidhet që në fillim të javës së ardhshme.
“E gjithë bota duhet të veprojë në drejtim të paqes”, tha Golob pas seancës së qeverisë. “Rruga për të arritur paqen është një zgjidhje me dy shtete.”
“Vendimi nuk është i drejtuar kundër askujt, madje as kundër Izraelit, por se është një mesazh paqeje,” shtoi ai ndërsa flamuri palestinez u shfaq në selinë e qeverisë në Lubjanë, kryeqyteti slloven.
Miratimi parlamentar është i nevojshëm që masa të hyjë në fuqi. Koalicioni liberal qeverisës i Golob ka një shumicë komode në asamblenë prej 90 anëtarësh dhe votimi duhet të jetë një formalitet.
Vendimi i qeverisë sllovene vjen vetëm dy ditë pasi Spanja, Norvegjia dhe Irlanda njohën një shtet palestinez, një veprim që u dënua nga Izraeli.
Me lëvizjen e saj, Sllovenia do të bëhet anëtari i 10-të i Bashkimit Evropian 27-vendesh që njeh zyrtarisht një shtet palestinez. Norvegjia nuk është anëtare e BE-së, por politika e saj e jashtme zakonisht është në linjë me bllokun.
