Pas deklaratës së zëdhënësit të BE-së, Peter Stano, se Kosova nuk ka dorëzuar raport të hetimeve për sulmin në Banjskë, zëdhënësi i Qeverisë së Kosovës, Përparim Kryeziu tha se një raport 48- faqësh për Banjskën ia kanë dorëzuar Bashkimit Evropian dhe shteteve anëtare vitin e kaluar.
Kryeziu tha se Stano duhet ta ketë këtë informacion por shtoi se nëse ai e ka fjalën për raportin që duhet të përgatitet nga prokuroria e vendit “atëherë kjo është një çështje për të cilën duhet të kërkojmë përgjigje nga vetë ky institucion”.
Ai shtoi se është shqetësuese dhe e pakuptimtë që pas 9 muajve nuk ka aktakuzë për Millan Radojiçiçin dhe se bashkësia ndërkombëtare nuk ka ndërmarrë masa ndaj Serbisë.
Zëdhënësi i Qeverisë deklaroi se Radojiçiçi vazhdon të mbetet i lirë dhe se është rrezik potencial i vazhdueshëm për sigurinë dhe paqen në rajon.
