Lajmi për ndarjen nga jeta të shkrimtarit të mirënjohur shqiptar, Ismail Kadare u pasqyrua nga mediat prestigjoze nëpër botë.
Në një artikull të sajin prestigjozja “New York Times” e ka cilësuar Kadarenë si njeriun me të cilin Shqipëria duhej të përballej gjatë regjimit komunist.
“Novelisti dhe poeti shqiptar e gdhendi atdheun e tij të izoluar në Ballkan në hartën e letërsisë botërore, duke krijuar shpesh vepra të errëta dhe alegorike që tërthorazi kritikonin regjimin totatitar të atij vendi” – shkruan “New York Times”.
Ndërkohë prestigjozja franceze “Le Monde” e ka vendosur Kadarenë në një piedestal me shkrimtarët ikonë si Xhorxh Oruell dhe Franc Kafka.
“Në stilin e tij të sofistikuar të rrëfimit të ngjarjeve, Kadare përdorte metaforën dhe ironinë për të nxjerrë në pah natyrën e tiranisë së Enver Hoxhës që sundoi në Shqipëri nga 1945 deri në vdekje në 1985-ën” – vijon më tej shkrimi i prestigjozes franceze.
“Ai përdori metaforën dhe sarkazmën e heshtur për të rrëfyer për fatin grotesk të vendit dhe popullit të tij, nën diktatorin paranojak Enver Hoxha” – shkruan “France24”.
Lajmi është pasqyruar edhe nga agjenci të tjera ndërkombëtare si “Reuters”, “ANSA” e “The Guardian”.
