Fredi Beleri do të betohet të martën në Strasburg si përfaqësues i partisë qeverisë greke, “Nea Demokracia”.
Pas lirimit nga burgu i Fierit mëngjesin e të hënës, Beleri udhëtoi nga Rinasi në Athinë për të takuar kryeministrin grek Kyriakos Mitsotakis. Tani ai ndodhet në Francë, ku ka filluar takimet e tij përgatitore për detyrën e re.
Në këtë kontekst, nënkryetari i Komisionit Europian, Margaritis Schinas ka bërë me dije në platformën X se është takuar me Belerin, para se ky i fundit të betohet në seancën plenare. Schinas ka qenë një nga mbështetësit më të rëndësishëm të çështjes “Beleri”, duke e mbështetur gjatë gjithë procesit të tij gjyqësor në Shqipëri.
Gjatë takimit, Schinas dhe Beleri diskutuan për prioritetet e ciklit të ri politik dhe për rëndësinë e respektimit të të drejtave dhe lirive në procesin e para-anëtarësimit për vendet kandidate. Nënkryetari i KE-së e përshkroi takimin si një “moment të veçantë dhe emocionues”.
“Europa është e barabartë me lirinë”, shkroi Schinas në X pas takimit, duke theksuar rëndësinë e sundimit të ligjit në procesin e integrimit të vendeve kandidate.
