Një ngjarje tragjike tronditi qytetin e Shkodrës para ca ditësh, kur një grua 27-vjeçare, nën presionin e një marrëdhënieje konfliktuale dhe ndikimeve të vazhdueshme nga bashkëshorti, tentoi të mbytej bashkë me katër fëmijët e saj në lumin Buna.
Burri i saj, në një intervistë për News24, tregoi se kishte marrë një telefonatë të rrallë dhe drithëruese nga gruaja e tij vetëm një orë para ngjarjes. Ajo i kishte thënë atij fjalët e fundit, “Ajet po të marr për herë të fundit”, duke e lënë atë të shokuar dhe të shqetësuar për fatin e saj dhe të fëmijëve.
“Nuk mund ta besoja atë që po më thoshte. Ishte e pabesueshme”, tha burri i gruas në emisionin “Me zemër të hapur”. Ai gjithashtu bëri të ditur se gruaja e tij kishte përjetuar një episod të ngjashëm tre muaj më parë, kur ishte nën presion të madh nga familja e saj dhe problemet martesore.
Burri gjithashtu sqaroi se situata ishte shpërthyer pas një periudhe tensioni të zgjeruar mes tyre dhe familjes së gruas. Ai akuzoi prindërit e gruas për ndikim negativ dhe për të krijuar probleme në martesën e tyre. Megjithatë, ai mohoi pretendimet se ishte në proces divorci me gruan e tij, duke theksuar se akuzat kundër tij ishin tërësisht të pavërteta.
