Ministri i Mbrojtjes, Niko Peleshi, ka reaguar ndaj situatës aktuale të zjarreve në vend. Në 24 orët e fundit, janë raportuar 21 vatra zjarri në të gjithë territorin kombëtar, prej të cilave 18 janë shuar përmes përpjekjeve intensive të forcave operacionale në kushte të vështira temperaturash.
Sipas Qendrës Kombëtare Operacionale të Emergjencave Civile, 3 vatra zjarri vazhdojnë të jenë aktive. Forcat e Armatosura, së bashku me Forcat Zjarrfikëse dhe shërbimin pyjor, po angazhohen për të shuar zjarrin në fshatin Pregjë-Lurë, Dibër, si dhe për të menaxhuar situatat në Shënmëri, Mirditë dhe në zonën midis Goranxit dhe Derviçan, Dropull i Poshtëm.
Kushtet e vështira të terrenit dhe erës së fortë kanë rritur sfidat për operacionet e shuarjes së zjarreve në fshatrat Dhuvjan, Goranxi dhe Derviçan. Ministria e Mbrotjes bën thirrje për bashkëpunim nga banorët për të raportuar në kohë çdo vatër zjarri, për të parandaluar përhapjen e tij në zona më të gjera.
