Prezenca e OSBE-së në Shqipëri ka reaguar pas amendamentit të propozuar nga deputetet e PS-së dhe PD-së për ndryshimet në Kodin Zgjedhor.
OSBE shprehet se ndryshimet në Kodin Zgjedhor duhet të garantojnë pozitën udhëheqëse të Shqipërisë në lidhje me përfaqësimin gjinor në parlament.
“Prezenca e OSBE-së në Shqipëri çmon përparimin e jashtëzakonshëm në fushën e barazisë gjinore që ka bërë Shqipëria gjatë viteve të fundit, veçanërisht për pjesëmarrjen dhe përfaqësimin e grave në jetën politike.
Ne mirëpresim përpjekjet aktuale ndërpartiake, të drejtuara nga gratë deputete, dhe shpresojmë që ndryshimet në Kodin Zgjedhor të garantojnë pozitën udhëheqëse të Shqipërisë në rajon e më gjerë në lidhje me përfaqësimin gjinor në parlament”, thuhet në reagimin e OSBE.
Kryetarja e Parlamentit Lindita Nikolla, ministrja Elisa Spiropali, Etilda Gjonaj dhe deputetet demokrate Albana Vokshi dhe Dhurata Çupi kanë kërkuar që edhe në pjesën e hapur të listës, të sigurohet që ⅓ e atyre që do të shkojnë në Parlament të jenë gra.
