Koalicioni për Reforma, Integrim dhe Institucione të Konsoliduara bëri publike gjetjet paraprake për zgjedhjet në Himarë.
Sipas KRIIK u vu re prania e personave të paautorizuar në afërsi të qendrave të votimit.
“Personat e paautorizuar që qëndronin pranë qendrave të votimit ose ishin të pajisur me lista ose, kryesisht në fshatrat e vegjël, nuk e mbanin një të tillë për shkak se komuniteti është i vogël dhe njihen më me njëri-tjetrin. Kjo u mundësonte të kishin informacion të plotë mbi personat që paraqiteshin për të votuar”, thuhet në raportin e KRIIK.
Sipas KRIIK vëzhguesit vërejtën një numër të lartë zgjedhësish që nuk lyeshin me bojë në gisht fare ose nuk lyheshin pasi kishin votuar por në kundërshtim me procedurat e parashikuara.
“Mjediset e qendrave të votimit, në një numër jo të vogël rastesh nuk ishin të përshtatshme për votim dhe në gjendje tejet të amortizuar, tërësisht të pa përshtatshme për të kryer funksionin e një qendre votimi. Ndërkohë, në një numër të lartë qendrash votimi mungonin posterat që shpjegonin procedurat e votimit apo që duhet të prezantonin kandidatët”, thotë KRIIK.
