Lili Sula, drejtuesja e departamentit të Arsimit në Partinë Demokratike, ka kritikuar ashpër Ministrinë e Arsimit dhe Sportit për menaxhimin e projektit të diskutueshëm ‘Klea Rama’.
Në një deklaratë, ajo ka theksuar se Ministria po i lë pas dore problemet e mëdha në sektorin e arsimit dhe po mbulon skandalin në fjalë “Ministria e Arsimit dhe Sportit vijon të heshtë për skandalin ‘Klea Rama’. Ajo ka heshtur gjithashtu për rrënimin e cilësisë së arsimit, braktisjen e shkollave nga nxënësit, degradimin e profesionit të mësuesit, mosfinancimin e arsimit, dhe degradimin e infrastrukturës shkollore.”
Sula ka akuzuar ministrinë për neglizhencë dhe për mbrojtjen e zyrtarëve të saj të paaftë e të korruptuar. Ajo ka bërë thirrje për përgjegjësi dhe ndëshkim për dëmet e shkaktuara nga ky projekt, duke theksuar se “Heshtja dhe mosreagimi i ministrisë ndaj shkeljeve të bëra nga zv. ministrja dhe zyrtarë të tjerë është një dëshmi e papërgjegjshmërisë ose përfshirjes në këtë skemë mashtrimi.”
Sula ka kërkuar dorëheqjen e ministrëve të përfshirë dhe ka shprehur mbështetje për reformimin e arsimit në Shqipëri, duke thënë “Partia Demokratike është e angazhuar për ndalimin e katastrofës që solli rilindja dhe rikthimin e arsimit në vlerat e tij të vërteta.”
