Departamenti amerikan i Shtetit (DASH) ka refuzuar akuzat e Rusisë dhe Serbisë që sugjerojnë se SHBA-të kanë nxitur protestat antiqeveritare në Serbi.
DASH-i e cilëson këtë si një përpjekje të Rusisë për të instrumentalizuar protestat për të ndjekur agjendën e saj në rajon. Protestat, që janë organizuar nga aktivistë mjedisorë, kërkojnë ndalimin e minierave të litiumit në Serbi, një projekt që është rikthyer pas një periudhe refuzimi nga qeveria serbe.
Moska ka akuzuar Perëndimin për përkrahjen e këtyre protestave, ndërsa zëvendëskryeministri serb, Aleksandar Vulin, ka falënderuar agjencitë ruse për “paralajmërimin” lidhur me tentativat për trazira.
DASH-i thekson se mbështetja për protestat paqësore është një pjesë e rëndësishme e demokracisë dhe e drejta e qytetarëve për të protestuar është e garantuar. Protestat janë shpërthyer për shkak të shqetësimeve mbi ndikimin e mundshëm të minierave në mjedis.
