Presidentja e Kosovës, Vjosa Osmani, ka theksuar në një aktivitet në kryeqytetin e Kosovës se pa ndihmën e SHBA dhe pa luftën çlirimtare, Kosova nuk do të ishte e lirë dhe e pavarur.
“Kosova është shtet i pavarur e demokratik dhe SHBA është këtu me ne. Thirrja jonë për drejtësi u dëgjua. Ky shesh ruan kujtimin tonë historik”, është shprehur Osmani.
Ajo ka nënvizuar rëndësinë e vizitës së vitit 1990 nga senatori Bob Dole dhe delegacioni amerikan, duke e konsideruar atë si një moment kyç për dëgjimin e zërit të shqiptarëve të Kosovës.
Osmani ka vlerësuar rolin e presidentit Ibrahim Rugova si themelues të shtetit të Kosovës dhe ka shprehur mirënjohje për mbështetje e vazhdueshme të SHBA-së në procesin e çlirimit dhe pavarësisë së Kosovës.
