Pas atentatit në Don Bosko ku u plagosën dy persona, deputeti Ervin Salianji ka kritikuar ashpër situatën e sigurisë.
Ai akuzon policinë se nuk po parandalon krimin, por vetëm informon për ngjarjet. Sipas Salianjit, rënia e rendit dhe sigurisë është e qartë dhe krimi vepron pa frikë nga autoritetet.
Ai kërkon një reformë të thellë në policinë e shtetit për të luftuar më efektivisht kriminalitetin dhe për të rikthyer rendin dhe sigurinë.
“Fati, mbetet të jetë rojtari i qytetarëve!
Policia as parandalon, as kap; policia vetëm informon, sikur të ishte agjensi lajmesh. Madje në rastet e përfshirjes së zyrtarëve rilindas në krime ka rolin e mbuluesit të ngjarjes dhe manipulimit!
Vetëm këputja e lidhjeve të drejtuesve të policisë me krimin, promovimi i profesionistëve, dhe depolitizimi i policisë do ta bëjë efiçente policinë e shtetit që ka brënda radhëve të saj profesionistë që meritojnë të jënë në krye të luftën ndaj krimit dhe jo të dhunohen nga krerët e kapur prej krimit.
Çlirimi i policisë nga prangat e krimit dhe lufta pakompromis ndaj çdo forme të kriminalitetit është emergjencë për të kthyer rendin dhe sigurinë!”, shkruan Salianji.
