Ministri i Punëve të Brendshme të Kosovës, Xhelal Sveçla, ka akuzuar ekstremistë serbë të maskuar për bllokimin dhe kthimin e një familjeje kosovare që po udhëtonte për në Gjermani.
Sveçla deklaroi në Facebook se incidenti ndodhi para syve të policisë serbe, e cila, sipas tij, është bashkëfajtore në këtë akt. Ai theksoi se pika kufitare në Bërnjak do të mbetet e mbyllur për qarkullim deri në stabilizimin e situatës.
“Para pak çastesh, një familjes e cila po udhëtonte për në Gjermani, i është pamundësuar vazhdimi i udhëtimit dhe është kthyer prapa me forcë. Kjo po ndodhë para syve të policisë së Serbisë, fakt ky që e bën atë bashkë fajtore. Këto akte fashiste ku serbët lejohen pavarësisht dokumentacioneve që posedojnë kurse shqiptarët pengohen pavarësisht dokumentacioneve që posedojnë, janë absolutisht të papranueshme për ne”, shkroi Sveçla.
