Në debatin e zhvilluar më 10 Shtator 2024, zëvendëspresidentja Kamala Harris theu mbrojtjen e Donald Trumpit me një sërë sulmesh të ashpra mbi çështje të ndjeshme si aborti dhe problemet e tij me gjyqësorin. Harris, e njohur për qasjen e saj të fuqishme, arriti të provokonte Trumpin, duke e bërë atë të reagojë nervozisht dhe të japë përgjigje të pasakta.
Harris përmendi tubimet e Trumpit, duke theksuar se njerëzit shpesh i lënë ato herët për shkak të “rraskapitjes dhe mërzisë”. Trump reagoi duke mbrojtur mitingjet e tij si më të mëdhatë dhe më të mahnitshmet në historinë e politikës. Konflikti mes kandidatëve u thellua, me përplasje mbi emigracionin, politikën e jashtme dhe kujdesin shëndetësor, por debati shpesh u karakterizua nga sulme personale dhe mungesë e detajeve politike të rëndësishme.
Pas debatit, Trump e quajti performancën e tij si “debati më i mirë ndonjëherë” dhe akuzoi moderatorët e ABC për komplot kundër tij. Ai kritikoi gjithashtu Harris për kërkimin e një debati të dytë, duke pretenduar se ajo kishte pësuar një disfatë të rëndë.
Debati i parë mes Trump dhe Harris përfundoi me akuza të ashpra reciproke dhe mund të ndikojë ndjeshëm në rezultatin e zgjedhjeve presidenciale të 5 nëntorit, duke pasur parasysh se sondazhet e fundit tregojnë një garë të ngushtë mes tyre.
