Në kuadër të megaoperacionit të koduar “Tempulli,” Policia e Shkodrës ka arrestuar në flagrancë një 44-vjeçar, B. S., i dyshuar për shitje të lëndëve narkotike.
I arrestuari, i cili ishte në pronësi të një lokali në lagjen “Guerrile,” ishte kapur në momentin kur po shiste doza kokaine.
Gjatë kontrollit në lokalin e tij, agjentët e sektorit për Hetimin e Narkotikëve, në bashkëpunim me shërbimet e Forcës së Posaçme “Shqiponja,” sekuestruan doza kokaine të gatshme për shitje, një peshore elektronike, dy celularë dhe një shumë parash që dyshohet të jetë përfituar nga aktiviteti i paligjshëm.
Materialet procedurale janë dorëzuar në Prokurori për vazhdimin e hetimeve dhe procedimeve ligjore.
