Presidentja e Komisionit Evropian, Ursula von der Leyen, do të presë liderët e Ballkanit Perëndimor në Bruksel më 19 shtator për të diskutuar progresin e reformave para ndarjes së pagesave nga Plani i Rritjes për këtë rajon.
Ky plan, i miratuar nga BE-ja në maj, synon të ndihmojë në zhvillimin ekonomik dhe përshpejtimin e integrimit evropian, me një alokim prej rreth 6 miliardë eurosh për periudhën 2024-2027. Kosova, Shqipëria, Maqedonia e Veriut, Mali i Zi, Bosnje e Hercegovina dhe Serbia janë përfitues të këtij plani.
Von der Leyen ka mbështetur fort këtë plan, i cili ka si qëllim të nxisë reformat dhe bashkëpunimin rajonal. Sidoqoftë, procesi i miratimit është vonuar, duke pasur parasysh që Bosnje e Hercegovina ende nuk ka dorëzuar planin e saj.
Pritet që vendet e rajonit të përmbushin kushte specifike, përfshirë avancimin në normalizimin e marrëdhënieve, për të përfituar nga fondet e plota.
