Një situatë alarmante është krijuar në Piskovë të Përmetit, ku zjarri ka riaktivizuar vatrat e flakëve në landfillin e mbeturinave, duke shkaktuar tym kancerogjen që rrezikon shëndetin e banorëve.
Flakët filluan gjatë fundjavës dhe kanë shkaktuar shqetësim te komuniteti, i cili dyshon se punonjësit e Bashkisë së Përmetit mund të kenë ndezur zjarrin, i cili më pas ka dalë jashtë kontrollit.
Kryeplaku i fshatit, Arlind Dyrmishi, ka theksuar se, megjithëse ishte lajmëruar për ndihmën e zjarrfikësve, ata nuk kanë arritur të shkojnë në vendngjarje. Ai ka shprehur vendosmërinë për të paraqitur këtë çështje në SPAK, duke akuzuar aktorë të njohur të pushtetit lokal dhe qendror, përfshirë ministres Mirela Kumbaro.
Situata ka arritur në një pikë kritike, me të gjitha mbeturinat që po digjen në landfillin që ka shërbyer për të gjithë bashkinë.
