Gratë deputete të Partisë Socialiste kanë dënuar ashpër incidentin ku deputeti Xhelal Mziu shtyu kolegen Milva Ekonomi në Kuvend. Në deklaratën e tyre, ato theksojnë se ky akt dhune është një sulm ndaj parimeve që udhëheqin punën e tyre.
“Kur ky akt i papranueshëm ndodh në ambientet e Kuvendit, dëmton dinjitetin dhe të drejtat e grave që ushtrojnë funksione publike,” thonë ato, duke e cilësuar ngjarjen si të shëmtuar dhe të dënueshme.
Gratë deputete kërkojnë respekt dhe tolerancë në Kuvend, duke theksuar se ngjarje të tilla cënojnë standardet morale dhe etike të përfaqësuesve të zgjedhur. “Kuvendi duhet të jetë vendi ku qytetarët presin modelin e respektit dhe komunikimit civil,” përfundojnë ato.
