Ministri i Brendshëm Ervin Hoxha ka prezantuar sot drejtuesen e re të kompanisë shtetërore të prodhimit të dokumenteve biometrike “IdentiTek”. Drejtuesja e re e kësaj kompanie shtetërore është Freskida Halilaj.
Ministri Hoxha në prani të stafit të kompanisë dhe Këshillit Mbikëqyrës u shpreh se “Falënderova me mirënjohje, drejtuesen e derisotme të këtij institucioni, Loina Prifti, për punën e bërë në drejtimin e “IdentiTek”. Falë përkushtimit të saj dhe stafit të kompanisë, kemi siguruar standardet e larta ndërkombëtare, të ruajtjes së të dhënave dhe prodhimit të dokumenteve biometrike”.
Kompania “IdentiTek” prodhon karta identiteti e pasaporta biometrike për shqiptarë por edhe pasaporta diplomatike e shërbimi. Gjithashtu prodhon edhe dokumente udhëtimi, leje qëndrimi dhe letërnjoftim elektronik enkas për qytetarët e huaj me qëndrim të përhershëm ose të përkohshëm, brenda territorit të Republikës së Shqipërisë, ose që kanë fituar statusin e refugjatit e kanë përfituar azil këtu.
